شامی سے ہمدردی، رضوان پر فخر
انصار عباسی
چند دن قبل بھارت کرکٹ ٹیم کے مسلمان بالر شامی نے ورلڈ کپ کے ایک میچ میں بہترین بائولنگ کی اور پانچ وکٹ حاصل کیے۔ پانچویں وکٹ لیتے وقت شامی نے خوشی میں پہلے آسمان کی طرف دیکھا اور پھر سجدہ کرنے کی خاطر بیٹھا لیکن فوری رک گیا اور سجدہ نہ کیا۔ اس پر سوشل میڈیا میں شامی کی وڈیو اور تصاویر کو شیئر کیا گیا اور سوال اُٹھائے گئے کہ مودی کے بھارت میں ایک مسلمان کھلاڑی خوشی میں میدان میں سجدہ بھی نہیں کرسکتا۔گزشتہ روز پاکستان نے نیوزی لینڈ کو ہرا دیا جس میں فخر زمان کی بیٹنگ کا بہت اہم کردار تھا۔ فخر زمان نے سنچری مکمل ہونے پر میدان میں سجدہ شکر ادا کیا۔
ورلڈ کپ کے ایک پہلے میچ میںپاکستان کرکٹ ٹیم کے وکٹ کیپر اورا سٹار بیٹسمین رضوان نے بھی جب سنچری بنائی تو سجدہ کیا۔ فخر اوررضوان کا حوالہ دے کر کچھ لوگوں نے شامی کی تصویر شیئر کی اور اُنہیں تنقید کا نشانہ بنایا۔یہ سب پر ظاہر ہے کہ شامی خوشی میں سجدہ کرنا چاہتا تھا لیکن سوال ہے کہ اُس نے ایسا کیوں نہیں کیا؟ اُس کی سب سےبڑی وجہ مودی اور ہندوتوا کا وہ بھارت ہے جہاں مسلمان بہت مظلوم ہیں، اُن پر ظلم کے پہاڑ توڑے جارہے ہیں، اُن پر اسلام کو چھوڑ کر ہندو بننے کا دبائو ڈالا جاتا ہے،
اُنہیں گائے کا گوشت کھانے پر مار دیا جاتا ہے۔ مسلمانوں کو کسی ایک یا کسی دوسرے بہانے جان سے مارنے کے واقعات میں بے پناہ اضافہ ہو چکا۔ مسلمان طالبات کو برقعہ پہن کر اسکول کالج جانے پر پابندی لگائی جا رہی ہے۔ گویاایک ایسے ملک میں جہاں مسلمانوں کو مسلمان ہونے پر ہر قسم کے ظلم اور تشدد کا نشانہ بنایا جاتا ہے وہاں کے مسلمان ہماری ہمدردی اور سپورٹ کے مستحق ہیں۔ شامی بھارت میں رہنے والے مظلوم مسلمانوں کی نمائندگی کرتا ہے۔ ہو سکتا ہے وہ سجدہ کرنے سے اس لیے رک گیا
ہو کہ اگر وہ میدان میں سجدہ کرے گا تو پھر ہندو شدت پسند اُس کے پیچھے پڑ جائیں گے، اُس کا جینا حرام کر دیں گے۔ کچھ عرصہ قبل پاکستان کے ساتھ بھارت کے ایک کرکٹ میچ میں شامی کی بائولنگ پر پاکستان نے کافی اسکور کیا اور وہ میچ بھارت ہار گیا جس پر شامی کو مسلمان ہونے پر بھارتیوں نے طعنے دیے، دھمکیاں ملیں اور اُس کی سوشل میڈیا پر بے پناہ ٹرولنگ کی گئی۔ بھارتی فلم انڈسٹری کے بڑے مسلمان اداکار بھی اگر کوئی ایسی بات کر جائیں جو پاکستان کی کسی بھی طرح حمایت میں چلی جائے
تو اُنہیں بھی طعنہ دیے جاتے ہیں اور بھارت چھوڑ کر پاکستان جانے کا کہا جاتا ہے۔ بھارت کو ہندوتوا سوچ نے اپنی گرفت میں جکڑ لیا ہے جس کا سب سے بڑا شکار مسلمان ہیں۔ بھارتی مسلمان بہت مظلوم ہیں اور اُن کی مظلومیت کو ہمیں سمجھنا چاہیے، اُن کی ہر ممکن مدد کرنی چاہیے اور دنیا میں بھارت میں مسلمانوں پر ڈھائے جانے والے مظالم کے خلاف آواز اُٹھانی چاہیے۔ شامی ہماری ہمدردی کا مستحق ہے
اس ٹویٹ کو ڈیلیٹ کروانے کے لیے انٹرنیشنل کرکٹ کونسل اور بھارتی کرکٹ بورڈ کے کچھ لوگ جو اس پر بڑے ناراض تھے نے پاکستان کرکٹ بورڈ کے ساتھ یہ معاملہ اُٹھایا۔ رضوان نے ہر قسم کے دبائو کے باوجود اپنا ٹویٹ ڈیلیٹ کرنے سے انکار کر دیا۔ کیا یہ حقیقت ہے کہ رضوان پردبائو ڈالنے کے لیے پاکستان کرکٹ بورڈ نے بھی کوئی کردار ادا کیا؟
