پاک چین تعاون کے فروغ سے زراعت کے شعبے پر مثبت اثر پڑے گا۔ چیئرمین پی اے آر سی، ڈاکٹر غلام محمد علی
اسلام آباد ( بیورو چیف اسلام آباد) مسٹر وو یولانگ، محکمہ سائنس اور ٹیکنالوجی، صوبہ ہوبے، چین کی قیادت میں ایک وفد نے قومی زرعی تحقیقاتی مرکز (NARC) اسلام آباد کا دورہ کیا۔ اس موقع پر زرعی یونیورسٹی فیصل آباد کے وائس چانسلر پروفیسر ڈاکٹر اقرار احمد خان اور ORIC کے ڈائریکٹر ڈاکٹر محمد جعفر جسکانی سمیت یونیورسٹی آف ایگریکلچر فیصل آباد کے دیگر اعلیٰ حکام بھی موجود تھے۔ وفد میں سوشل ڈویلپمنٹ ٹیکنالوجی ڈویڑن کی ڈائریکٹر محترمہ شی ہونگ، صوبہ ہوبے کے عہدیدار مسٹر یی لین، ہوبے جنرل ہسپتال کے ڈپٹی ڈین مسٹر شاؤ شوان اوردیگر معزز حکام شامل تھے۔
پاکستان زرعی تحقیقاتی کونسل (PARC) کے چیئرمین ڈاکٹر غلام محمد علی نے معزز مہمانوں کا پرتپاک استقبال کیا اور زرعی شعبے میں جدت کو فروغ دینے کے لیے پی اے آر سی کی کاوشوں کا ایک جائزہ پیش کیا۔ ڈاکٹر علی نے اس بات پر روشنی ڈالی کہ پی اے آر سی ملک کے دس مختلف زرعی ماحولیاتی خطوں میں زرعی تحقیق اور ترقی میں فعال طور پر سرگرم عمل ہے، اور ملکی اور بین الاقوامی اداروں کے ساتھ تعاون قائم کر رہا ہے۔ مزید برآں، ڈاکٹر علی نے زراعت کے شعبے میں پی اے آر سی اور چینی تحقیقی اداروں کے درمیان دیرینہ شراکت داری پر روشنی ڈالی۔
مسٹر وو یولانگ نے پرتپاک استقبال پر چیئرمین پی اے آر سی کا شکریہ ادا کیا اور ہائبرڈ چاول، سویا بین، لیموں اور جانوروں کی ویکسینیشن جیسے شعبوں میں ہوبے ایگریکلچر ریسرچ انسٹی ٹیوٹ کی نمایاں مہارت کو اجاگر کیا۔ اس کے علاوہ، انہوں نے سائنسی تحقیقی سرگرمیوں کو انجام دینے میں انسٹی ٹیوٹ کی غیر معمولی قابلیت پر زور دیا۔ مسٹر یولانگ نے اپنے تحقیقی نتائج کو شیئر کرنے اور پی اے آر سی کے ساتھ تعاون کو فروغ دینے میں گہری دلچسپی کا اظہار کیا، جس کا مقصد پاکستانی زرعی محققین کے تجربات سے بصیرت حاصل کرنا ہے۔ مزید برآں، انہوں نے اس بات پر زور دیا کہ زرعی تحقیق میں تعاون کو فروغ دینے سے نہ صرف سائنسی ترقی میں اضافہ ہوگا بلکہ دونوں ممالک کے درمیان برادرانہ تعلقات کو بھی تقویت ملے گی۔
اپنے دورے کے دوران، وفدنے نیشنل انسٹی ٹیوٹ آف جینومکس اینڈ ایگریکلچرل بائیو ٹیکنالوجی (نگاب) اور پلانٹ جینیٹک ریسورسز انسٹی ٹیوٹ (پی جی آر آئی) میں تحقیقی لیبارٹریوں کا مشاہدہ کیاجہاں انہوں نے جاری تحقیقی سرگرمیوں کی تعریف کی۔ چیئرمین پی اے آر سی نے این اے آر سی میں جاری تحقیقی سرگرمیوں کے بارے میں بریفنگ فراہم کی، جس میں فصلوں کی جینیات میں اضافہ اور فنکشنل جینومکس میں پیشرفت سمیت متنوع شعبوں کا احاطہ کیا گیا ہے۔
ڈاکٹر غلام محمد علی نے پروفیسر ڈاکٹر اقرار احمد خان، وائس چانسلر یونیورسٹی آف ایگریکلچر، فیصل آباد اور ان کی ٹیم کا بھی ان کے غیر معمولی انتظامات پر شکریہ ادا کیا اور دونوں ممالک کے درمیان اس شعبے میں تعاون کو مضبوط بنانے میں ان کی کوششوں کا اعتراف کیا۔ دورے کے اختتام پر ڈاکٹر علی نے وفد کو پی اے آر سی کی شیلڈز پیش کیں۔
https://www.youtube.com/watch?v=kvJM8G_sUYA
