چیئرمین پیپلز پارٹی بلاول بھٹو زرداری نےکہا ہےکہ آزاد ارکان پر نظر ہے، ہم نے اپنی ورکنگ پوری کرلی ہے، آزاد  ارکان کے ساتھ مل کر  پیپلز پارٹی کی حکومت بنائیں گے۔

نوشہروفیروز  میں صحافیوں سے غیر رسمی گفتگو کرتے ہوئے بلاول کا کہنا تھا کہ ہم حکومت بنائیں گے تو نواز شریف اپوزیشن لیڈر  بنیں گے، آصف زرداری الیکشن کے بعد آپ کو مزید سرگرم نظر آئیں گے۔

بلاول بھٹو زرداری کا کہنا تھا کہ  نواز شریف سمجھتے ہیں کہ تاثر بنا کر حکومت میں آئیں گے لیکن ایسا نہیں ہوگا، جیت عوام کی ہوگی، جیت پیپلزپارٹی کی ہوگی، جتنی سیاسی جماعتیں ہیں ذاتی دشمنی کے لیے الیکشن لڑ  رہی ہیں، میں آپ کےلیے الیکشن لڑ رہا ہوں، آپ کی ترقی چاہتا ہوں۔

چیئرمین پیپلز پارٹی کا مزیدکہنا تھا کہ عوام مجھے وزیر اعظم بنائیں مل کر غربت اور بیروزگاری کا مقابلہ کریں گے، سندھ اور  وفاق میں پیپلزپارٹی کی حکومت بنائیں گے، مقابلہ تیر  اور  شیر کے درمیان ہے، 100فیصد سیٹیں  پیپلز پارٹی کو  جتوائیں تاکہ ہم  مہنگائی اور  بیروزگاری کا مقابلہ کرنےکے 10 نکاتی ایجنڈے  پر عمل کرسکیں۔