پاکستان کسان اتحاد کی جانب سے گندم خریداری شروع نہ ہونے کے خلاف ملتان پریس کلب کے سامنے گندم کو آگ لگا کر احتجاج کیا گیا۔

احتجاجی مظاہرے سے خطاب کرتے ہوئے چیئرمین کسان اتحاد خالد کھوکھر کا کہنا تھا کہ آج سے ہم احتجاجی تحریک شروع کررہے ہیں جس کا نام زراعت بچاؤ پاکستان بچاؤ ہے۔ 

ان کا کہنا تھا کہ ہم پنجاب کے مختلف اضلاع میں جائیں گے اور احتجاج ریکارڈ کروائیں گے، حکومت ہمارے ساتھ دھوکہ نہ کرے سچ بولے، ہم سے پہلے کمٹمنٹ کی گئی کہ گندم کی خریداری کی جائے گی لیکن اب نہیں خرید رہے۔ 

خالد کھوکھر کا مزید کہنا تھا کہ کاشت کار کو 1500 ارب روپے کا نقصان ہوا ہے، جب اگلی فصل کے پیسے نہیں ہوں گے تو کپاس کیسے ہوگی؟

خالد کھوکھر کا کہنا تھا کہ ہم نے گندم 2700 روپے میں بیچی ہے، غریب کو بھی سارا سال اس قیمت پر گندم ملنی چاہیے۔ 

احتجاج کے دوران بڑی تعداد میں کسانوں نے اپنا احتجاج ریکارڈ کروایا اور نعرے بازی کی۔