بلاول بھٹو زرداری کے قافلے پر لیاری میں پتھراؤ کرنے والے افراد کے خلاف مقدمہ درج
کراچی: چیئرمین پیپلز پارٹی بلاول بھٹو زرداری کے قافلے پر لیاری میں پتھراؤ کرنے والے افراد کے خلاف مقدمہ درج کرلیا گیا۔
پولیس کے مطابق سرکار کی مدعیت میں درج مقدمے میں 13 مقامی افراد اور 400 سے زائد نامعلوم افراد کو نامزد کیا گیا ہے۔
پولیس کا کہنا ہے کہ مقدمے میں حاجی باوا، رفیق بنگورہ اور اسماعیل سمیت 13 مقامی افراد نامزد ہیں جب کہ مقدمے میں بلوا کرنے، ہنگامہ آرائی اور دہشت گردی کی دفعات شامل کی گئی ہیں۔
ایس ایس پی سٹی سمیع اللہ سومرو کا کہنا ہے کہ پیپلز پارٹی کی ریلی پر پتھراؤ کرنے والے افراد کی شناخت کرلی گئی ہے تاہم ملزمان گزشتہ روز ہی علاقے سے فرار ہوگئے۔
ایس ایس پی سٹی کے مطابق پتھراؤ کرنے والوں کی گرفتاری کے لیے چھاپے مارے جارہے ہیں، ملزمان کے موبائل فون نمبرز سے ان کی لوکیشن مل گئی ہے
یاد رہے کہ گزشتہ روز چیئرمین پیپلز پارٹی بلاول بھٹو زرداری اپنے حلقہ انتخاب این اے 246 لیاری پہنچے اور ریلی کی صورت میں انتخابی مہم کا آغاز کیا۔
تاہم جیسے ہی ان کی ریلی بہار کالونی پہنچی تو علاقہ مکینوں کی بڑی تعداد سڑکوں پر نکل آئی اور قافلے کو روک لیا۔
مشتعل مظاہرین نے پیپلز پارٹی کے خلاف نعرے بازی کی اور بلاول بھٹو کے قافلے میں موجود گاڑیوں پر پتھراؤ کیا اور ڈنڈے بھی برسائے جس کے بعد انہیں فوری طور پر علاقے سے واپس جانا پڑا۔
Patharao etijaj nahi hota. Jab koi pathar marta hain to woh ehtijaji nahi, sharpasand banjata hain. Kal Kia bandooq chlana etijaj hoga? Proud of ppl of lyari who didn’t respond to the politics of violence. Sending saboteurs to opponents events rebrehnsible. pic.twitter.com/02EiY8zNak
— BilawalBhuttoZardari (@BBhuttoZardari) July 1, 2018
دوسری جانب بلاول بھٹو زرداری نے اپنے ٹوئٹر بیان میں کہا کہ پتھراؤ احتجاج نہیں ہوتا، جب کوئی پتھر مارتا ہے تو وہ احتجاجی نہیں شر پسند بن جاتا ہے، انہوں نے سوال کیا کہ کل اگر کوئی بندوق چلانا شروع کردے تو کیا وہ بھی احتجاج ہوگا۔
چیئرمین پیپلز پارٹی کا مزید کہنا تھا کہ انہیں لیاری کے لوگوں پر فخر ہے جنہوں نے تشدد کی سیاست کا جواب نہیں دیا