سینیٹر شبلی فراز اور معاون خصوصی وزیراعظم برائے اطلاعات و نشریات لیفٹیننٹ جنرل (ر) عاصم سلیم باجوہ نے ذمہ داریاں سنبھال لیں
اسلام آباد (فائزہ شاہ کاظمی بیورو چیف اسلام آباد) وفاقی وزیر اطلاعات و نشریات سینیٹر شبلی فراز اور معاون خصوصی وزیراعظم برائے اطلاعات و نشریات لیفٹیننٹ جنرل (ر) عاصم سلیم باجوہ نے بدھ کو اپنی ذمہ داریاں سنبھال لیں۔
وفاقی وزیر اطلاعات و نشریات سینیٹر شبلی فراز اور معاون خصوصی وزیر اعظم برائے اطلاعات و نشریات لیفٹیننٹ جنرل (ر) عاصم سلیم باجوہ نے وزارت اطلاعات و نشریات کا دورہ کیا جہاں پر وفاقی سیکرٹری اطلاعات اکبر درانی اور وزارت کے ذیلی اداروں کے سربراہان نے
وزارت اور اداروں کے امور پر بریفننگ دی۔ وفاقی وزیر اطلاعات و نشریات سینیٹر شبلی فراز نے کہا کہ وزیراعظم عمران خان کا اہم ذمہ داری سونپنا میرے لئے اعزاز کی بات ہے، اطلاعات و نشریات ایک ایسی وزارت ہے جسے ہمیشہ سے روایتی انداز سے چلایا جاتا رہا ہے، ہم نے وزارت اطلاعات کے کردار کو مزید فعال اور متحرک بنانا ہے، یہ ایک دن کا کام نہیں اس کو بتدریج آگے بڑھائیں گی۔
انہوں نے کہا کہ آپ سب پیشہ وارانہ افسران ہیں، وزارت کو جدید خطوط پر استوار کرنے کےلئے ایک ٹیم کی طرح لگن سے کام کرنا ہو گا، ادب اور ثقافت کے فروغ کیلئے وزارت اطلاعات کا کردار نہایت اہم ہے۔ معاون خصوصی برائے اطلاعات و نشریات لیفٹیننٹ جنرل (ر) عاصم سلیم باجوہ نے کہا
کہ میرے لئے بطور معاون خصوصی کام کرنا باعث اعزاز ہے، ہم نے وزارت اطلاعات کو 21 ویں صدی کے تقاضوں سے ہم آہنگ کرنا ہے۔ انہوں نے کہا کہ انفارمیشن سروس اکیڈمی ملک کے نوجوانوں اور صحافیوں کی تربیت کیلئے عصر حاضر کے تقاضوں سے لیس پروگرام ترتیب دے، وزارت کے تمام اداروں کے مابین ہم آہنگی اور تعاون کا فروغ نہایت ضروری ہے۔