جموں و کشمیر لبریشن سیل میڈیا ونگ راولپنڈی سید علی گیلانی کے ایصال ثواب اور بلندی درجات کے لئے دعائیہ تقریب
راولپنڈی ( سٹی رپورٹر )آزادجموں و کشمیر کے وزیراعظم سردار عبدالقیوم خان نیازی کی ہدایت پر جموں و کشمیر لبریشن سیل میڈیا ونگ راولپنڈی کے زیر اہتمام تحریک آزادی کے عظیم لیڈر سید علی گیلانی کے ایصال ثواب اور بلندی درجات کے لئے دعائیہ تقریب کا اہتمام کیا گیا ۔سید علی گیلانی کے درجات کی بلندی کیلیے قرآن خوانی بھی کی گئی ۔دعائیہ تقریب میں حریت کانفرنس کے سینئر رہنماء سید یوسف نسیم ، تحریک حق خودارادیت انٹرنیشنل کے چئیرمین راجہ نجابت حسین ،ڈائریکٹر لبریشن سیل سرور حسین گلگتی ,
حریت رہنماء شیخ عبدالمتین ،حریت رہنماء نذیر کرناہی ،حریت رہنماء امتیاز وانی ،ڈپٹی ڈائریکٹر خان افسر خان ،معاون ناظم سردار نجیب الغفور خان ،معاون ناظم اطلاعات خواجہ عمران الحق ،سید ضمیر الحسن نقوی ،ملک بشیر احمد سمیت زندگی کے مختلف شعبوں سے تعلق رکھنے والے افراد نے شرکت کی ۔اس موقع پر سید علی گیلانی کی کشمیری قوم کے لئے خدمات کو شاندار الفاظ میں خراج عقیدت پیش کیا گیا ۔مقررین نے تحریک آزادی کشمیر میں سید علی گیلانی کی جدوجہد کو خراج عقیدت پیش کرتے ہوے کہا کہ سید علی گیلانی بھارتی فورسز کے غیر قانونی قبضے کے خلاف چٹان کی طرح کھڑے رہے
۔مقررین نے کہا کہ سید علی گیلانی کا قول ہم پاکستانی ہیں پاکستان ہمارا ہے ایک نظریہ ہے جس کے لئے لاکھوں کشمیریوں نے جانوں کا نذرانہ پیش کیا ۔مقررین نے کہا کہ پاکستان سے ان کی محبت لازوال تھی جس ہر انہیں خراج عقیدت پیش کرتے ہیں ۔مقررین نے بھارتی فوج کی جانب سے سید علی گیلانی کے جسد خاکی کو زبردستی چھیننے کی شدید مذمت کی اور کہا کہ بھارتی فوج نے انسانی حقوق کی دھجیاں اڑا کر رکھ دیں ۔مقررین نے بین الاقوامی برادری سے اپیل کی کہ وہ بھارتی فوج کی اس سفاکانہ حرکت کا نوٹس لیں اور اسے مقبوضہ کشمیر میں انسانی حقوق کی خلاف ورزیوں سے روکنے میں اپنا کردار ادا کریں ۔اس موقع پر سید علی گیلانی کے بلندی درجات ،شہداء کشمیر اور آزادی مقبوضہ کشمیر کے لئے خصوصی دعا کی گئی
