‘ہنسانے والا رلا گیا’، عمر شریف کے انتقال پر پاکستانی شوبز انڈسٹری میں سوگ
پاکستان کے معروف اداکار اورکامیڈین عمر شریف کے انتقال پر پاکستانی شوبز شخصیات نے گہرے دکھ اور افسوس کا اظہارکیا ہے۔
سینیئر اداکار جاوید شیخ کا کہنا ہےکہ ان کی حال ہی میں عمر شریف سے اسپتال میں ملاقات ہوئی تھی، ملاقات کے وقت عمر شریف کافی خوش لگ رہے تھے۔
جاوید شیخ کا کہنا تھا کہ میرا اور عمر شریف کا ساتھ 40 سال رہا، عمر شریف جیسا انسان شاید ہی پاکستان کی انٹرٹینمنٹ کی دنیا میں کبھی آئے۔
اداکارہ میرا نے افسوس کا اظہار کرتے ہوئےکہا کہ عمرشریف سے کراچی میں اسپتال میں ملاقات کرنا چاہتی تھی،عمرشریف دل کے بادشاہ تھے، ان کی سوچ بڑی تھی، پوری دنیا گھومی ہے، عمرشریف جیسے لوگ بہت کم ہوتے ہیں۔
اداکارہ عتیقہ اوڈھو کا کہنا ہے کہ عمرشریف نے پاکستان کا نام پوری دنیا میں روشن کیا، عمرشریف اور معین اختر نے صرف اداکاری ہی نہیں انسانیت بھی سکھائی، برے وقت میں بہت سے لوگوں نے میرا ساتھ چھوڑ دیا، مگر عمرشریف نےساتھ دیا۔
إِنَّا لِلَّٰهِ وَإِنَّا إِلَيْهِ رَاجِعُونَ
Deeply saddened to learn about Umer Sharif sb. He was without any doubt the ultimate comedy king. May Allah bless his soul. We will miss you Umer bhai! pic.twitter.com/2EUOv9FmNk
— Humayun Saeed (@iamhumayunsaeed) October 2, 2021
ادکارہ سونیا حسین کا کہنا ہےکہ مجھے وہ دن یاد ہے جب ہم پہلی بار ملے تھے، میں انڈسٹری میں نئی تھی اور اس وجہ سے تھوڑا گھبرائی ہوئی تھی، ایک بار ہم دونوں کو ایک ہی شو میں مدعو کیا گیا تھا، وہ میرے پاس آئے اور ہنستے ہوئےکہا ‘بیٹا چھوٹے سے کیمرے سے مت گبھراؤ ، اپنے ٹیلنٹ کو اتنا مضبوط کرلو کہ کیمرہ تمہاری پرفارمنس کو دیکھ کر تھر تھر کانپے’۔
معروف گلوکار علی ظفر نے بھی افسوس کا اظہار کرتے ہوئےکہا ہے کہ عمر شریف صاحب کے انتقال پر کچھ کہنے کے لیے میرے پاس الفاظ نہیں، اللہ ان کو جنت الفردوس میں اعلیٰ مقام عطا فرمائے اور ان کے خاندان کو صبر جمیل عطا فرمائے، آمین۔
You will be missed. 💔 pic.twitter.com/cC1Vf3dKom
— Ali Zafar (@AliZafarsays) October 2, 2021
گلوکار اور پاکستان تحریک انصاف کے رہنما ابرار الحق نےکہا ہےکہ ‘ہمیں ہنسانے والا آج ہمیں رلا کر چلاگیا، عمر شریف کی حب الوطنی اور انسان دوستی کو نہیں بھلایا جا سکتا’۔
Hamain hasanay wala aaj hamain rula kar chala gya.
Innalillah wainna ilehe rajeoun#UmerShareef ki muhibbe watni aur insan dosti ko nahi bhula ja sakta.💔 pic.twitter.com/hkiwZssssp— Abrar Ul Haq (@AbrarUlHaqPK) October 2, 2021
اداکارہ ماہرہ خان نے افسوس کا اظہار کرتے ہوئے کہا ہےکہ’ آپ کو ہمیشہ یاد رکھا جائے گا، ہنسانےکے لیے شکریہ’۔
You shall always always be remembered.. thank you for laughter. Rest in peace.. Umar Shareef.
إِنَّا لِلَّٰهِ وَإِنَّا إِلَيْهِ رَاجِعُونَ🤍 pic.twitter.com/LSGgUWvQ22
— Mahira Khan (@TheMahiraKhan) October 2, 2021
ماضی کی معروف اداکارہ بابرہ شریف کا کہنا تھا کہ عمر شریف نے لوگوں کے روزگار کا انتظام کیا تھا،ان جیسا انسان صدیوں میں پیدا ہوتا ہے، عمر شریف ہمارے لیے جو کرتے تھے شاید ہی ملک کا سربراہ کرے، عمر شریف کہتے تھے کہ بابرہ شریف اورعمر شریف کے نام سے ایک فلم آنی چاہیے۔
معروف اسٹیج اداکار شکیل صدیقی کا کہنا ہے کہ ہم نے جو بھی سیکھا عمر شریف سے سیکھا ہے، عمر شریف کے لیے جو بھی کہا جائے وہ کم ہے، دنیا میں اسٹیج کو روشناس کرانے میں عمرشریف کا ہاتھ ہے، عمرشریف کی وجہ سے بہت سے اداکاروں کو دنیا میں پہچان ملی۔
شکیل صدیقی کا کہنا تھا کہ جب تک کامیڈی رہےگی عمر شریف کی نقل ہوتی رہے گی، عمر شریف کام کے معاملے میں بہت سخت تھے، بھارت میں جتنے بھی کامیڈین ہیں سب عمرشریف کو استاد مانتے ہیں، حکومت سے اپیل ہےکہ ان کی والدہ کے نام پر عمر شریف کا اسپتال بنانےکا مشن پورا کیا جائے۔
اسٹیج کے معروف اداکار سلیم آفریدی کا کہنا تھا کہ ملک میں کامیڈی کے موجد عمر شریف ہیں، تمام کامیڈین غم میں ہیں، عمر شریف کا والدہ سےخاص رشتہ تھا، ان کے نام پر اسپتال بنا رہے تھے۔
سینیئر اداکار توقیر ناصر کا کہنا تھا کہ عمرشریف ایک عظیم آدمی تھے،عمرشریف کا انتقال ملک کا نقصان ہے،عمر شریف نے دنیا بھر میں پاکستان کانام روشن کیا،عمر شریف سے سیکڑوں بار ملا کبھی اداس نہیں دیکھا۔
اداکار شفقت چیمہ کا کہنا تھا کہ عمر شریف کا خلا اور کوئی پُر نہیں کرسکتا، عمر شریف کی یادیں ہمیشہ ہمارے ساتھ رہیں گی، اللہ عمر شریف کو جنت الفردوس میں اعلیٰ جگہ عطا فرمائے۔
اداکارہ ریشم کا کہنا ہےکہ عمر شریف بڑے فنکار تھے،ان کی شان میں الفاظ چھوٹے پڑ جاتے ہیں، عمرشریف بے پناہ صلاحیتوں کے مالک تھے، دنیا کوعمر شریف کے قدموں میں بیٹھتے دیکھا ہے، عمرشریف کا کام اور ان کی محبت ہمیشہ لوگوں کے دلوں میں زندہ رہےگی۔
اداکار احسن خان نے عمرشریف کےانتقال پرگہرےدکھ کا اظہار کرتے ہوئےکہا کہ عمر شریف نے پاکستان کا نام پوری دنیا میں روشن کیا، عمر شریف نے انڈسٹری کے لیے بہت کام کیا۔
اداکارہ سلومی کا کہنا تھا کہ ان کی عمرشریف کے ساتھ بہت یادیں وابستہ ہیں، عمر شریف کے ساتھ اچھا وقت گزرا، عمر شریف نے ہمیشہ مستحق لوگوں کی مدد کی۔