پاکستان زرعی تحقیقاتی کونسل کی جانب سے محفل میلاد مصطفی و سیرت النبی صلی اللہ علیہ وسلم سیمینار کا انعقاد
اسلام آباد (فائزہ شاہ کاظمی بیوروچیف اسلام آباد ) سر ور کونین ، محبوب رب العالمین، سرکار دو جہاں حضرت محمد مصطفی صلی اللہ علیہ وسلم اس کائنات کی جان ہیں۔ اہل محبت ماہ ربیع الاول میں حضور صلی اللہ علیہ وسلم کی پیدائش کی خوشی میں محافل انعقاد کر تے ہیں جن میں حضور صلی اللہ علیہ وسلم کی پیدائش اور حیات طیبہ کا ذکر کیا جاتا ہے۔اس سلسلے میں ہر سال کی طرح امسال بھی پاکستان زرعی تحقیقاتی کونسل کی جانب سے محفل میلاد مصطفی و سیرت النبی صلی اللہ علیہ وسلم سیمینار کا انعقادکیا گیا ۔ اس بابرکت محفل میں کثیر تعداد میں اہل ایمان نے شرکت کی۔ڈاکٹر غلام محمد علی چیئر مین پاکستان زرعی تحقیقاتی کونسل نے اس بابرکت محفل کی صدارت کی۔
تقریب کا آغاز تلاوت کلام پاک سے کیاگیا۔صدارتی ایوارڈ یافتہ قاری نذیر احمد نعیمی نے تلاوت کلام پاک کا شرف حاصل کیا۔ تلاوت کلام پاک کے بعد ثناء خوان حضرات محمد علی رضا ارشد ، جناب صاحبزادہ راحت قادری،جناب اختر بزمی، جناب راشد خان اور دیگر نے نعتیہ کلام پیش کیا اور محفل کی رونق کو دوبالا کیا۔ممتاز سیرت نگار پروفیسر ڈاکٹر حبیب اللہ چشتی نے اپنے خصوصی خطاب میں محبت مصطفی صلی اللہ علیہ وسلم اور سیرت مصطفی صلی اللہ علیہ وسلم پر تفصیلی روشنی ڈالی اور حضور صلی اللہ علیہ وسلم کی زندگی کے مختلف پہلوئوں پر بحث کی۔انہوں نے اپنے خطاب میں بیان کیا کہ حضور صلی اللہ علیہ وسلم کا اصل کارنامہ یہ ہے
کہ آپ صلی اللہ علیہ وسلم کی دعوت نے پورے کے پورے انسان کو اندر سے بدل دیا ۔12ربیع الاول وہ مقدس دن ہے جس کے بارے میں رب نے قسم کھا کر اس کی عظمت کا اظہار فرمایا ، عربی میں ربیع الاول کے معنی پہلی بہار ہے، کوئی شک نہیں اس دن اس ذات قدسی صفات کا ظہور ہوا جس سے زیادہ حسین کا تصور نہیں کیا جا سکتا اور جس کی حیات پاک سے زیادہ پاکیزہ مقدس اور پر بہار زندگی کا سوچا نہیں جا سکتا۔ اللہ کے آخری رسول صلی اللہ علیہ وسلم کے ہاتھوں انسانی زندگی کو نشاہ ثانیہ حاصل ہوئی اور حضور صلی اللہ علیہ وسلم نے ایک نظام حق کی صبح درخشاں سے مطلع تہذیب کو روشن کر کے بین الاقوامی دور تاریخ کا افتتاح فرمایا۔ یہ اتنا بڑا کارنامہ ہے جس کی مثال دوسری جگہ نہیں ملتی۔رسول کی اطاعت ، اطاعت خدا کی واحد عملی صورت ہے ۔
پروفیسر چشتی نے مزید کہا کہ رسول صلی اللہ علیہ وسلم ہی ایک مستند ذریعہ ہیں جس سے ہم تک خدا کے احکام اور فرامین پہنچے۔ کوئی اطاعت خدا ، رسول کی سند کے بغیر معتبر نہیں۔رسول کی پیروی سے منہ موڑنا خدا کے خلاف بغاوت ہے، اسی لئے رسول صلی اللہ علیہ وسلم نے فرمایا” جس نے میری اطاعت کی ، اس نے خدا کی اطاعت کی اور جس نے میری نافرمانی کی اس نے خدا کی نافرمانی کی”۔ حضور صلی اللہ علیہ وسلم بہترین اخلاق کا نمونہ ہیں۔
تقریب کے اختتام پر قاضی شفیق صاحب نے جملہ ملازمین اور پی اے آرسی کی ترویج و ترقی کے لئے دعا کی اور شرکاء میں لنگر بھی تقسیم کیا گیا۔
