وفاق کے بعد پنجاب میں بھی متحدہ اپوزیشن کامیابی کے لیے پرُامید ہے اور متحدہ اپوزیشن کے نامزد وزیراعلیٰ حمزہ شہباز کی سربراہی میں ابتدائی فارمولے پر کام بھی شروع کر دیا گیا ہے۔

ذرائع کا بتانا ہے کہ پنجاب میں اسپیکر شپ کا عہدہ ترین گروپ کو ملنےکا امکان ہے جس کے لیے سعید اکبر نوانی سمیت 2 ناموں پر غور کیا جا رہا ہے۔

ذرائع کے مطابق ڈپٹی اسپیکر کا عہدہ مسلم لیگ ن کو دیے جانے کا امکان ہے جبکہ پیپلز پارٹی کو بھی پنجاب میں 2 سے 3 وزارتیں ملنےکا امکان ہے۔

ذرائع کا کہنا ہے کہ پیپلز پارٹی کو 2 پارلیمانی سیکریٹری اور 2 قائمہ کمیٹیوں کی چیئرمن شپ بھی ملنےکا امکان ہے جبکہ سینئر وزیر کا عہدہ بھی اتحادی جماعت پیپلز پارٹی کو ملنےکا امکان ہے۔

ذرائع کے مطابق پیپلز پارٹی کے حسن مرتضیٰ، مخدم عثمان اور علی حیدر گیلانی ممکنہ وزیروں میں شامل ہوں گے۔

ذرائع کا بتانا ہے کہ ن لیگ کے ملک احمد خاں، رانا مشہود، ندیم کامران، عمران نذیر کو وزیر بنائے جانے کا امکان ہے جبکہ عظمیٰ بخاری، سلمان رفیق، رانا محمد اقبال کو بھی وزیر بنائے جانے کا امکان ہے۔

اس کے علاوہ بیگم ذکیہ شاہ نواز، مجتبیٰ شجاع، جگنو محسن اور دیگر کو بھی وزیر بنایا جا سکتا ہے جبکہ راہ حق پارٹی کو بھی منصب دیے جانے کا امکان ہے۔

ذرائع کا کہنا ہے کہ پنجاب میں حکومت سازی کی حتمی منظوری وزیراعظم شہباز شریف، نواز شریف اور آصف علی زرداری دیں گے۔