عمران خان کس حیثیت میں کے پی کے کا سرکاری ہیلی کاپٹراستعمال کررہے ہیں،کیپٹن عاصم ملک
لاہور(بیورپورٹ) معروف پاکستانی شخصیت اور ترجمان اوورسیز پاکستانیز کیپٹن عاصم ملک نے تحریک انصاف کے سربراہ عمران خان کی طرف سے خیبرپختونخوا کے سرکاری وسائل اور ہیلی کاپٹر ناجائز استعمال کرنے کی شدید مذمت کرتے ہوئے کہا ہے کہ عمران خان کس حیثیت میں اور کس بنیاد پر خیبرپختونخوا کے سرکاری ہیلی کاپٹر، گاڑیاں اور وسائل استعمال کر رہے ہیں، وہ نا تو اس وقت وزیراعظم ہیں،
نا ایم این اے ہیں اور نہ ہی اپوزیشن لیڈر، پھر یہ بات سمجھ سے بالاتر ہے کہ وہ خیبر پختونخوا کے سرکاری ہیلی کاپٹر سمیت دیگر وسائل کو بے دردی سے کیوں لوٹ رہے ہیں اور خیبرپختونخواہ حکومت بھی ان کو مکمل پروٹوکول دے رہی ہے، یہ سراسر نا انصافی اور صوبے کے وسائل ناجائز لوٹنے کے مترادف ہے، انہوں نے کہا کہ عمران خان خیبر پختونخوا کے سرکاری وسائل استعمال کرنا چھوڑیں کیونکہ وہ اس وقت عام پاکستانی اور صرف اپنی پارٹی کے چیئرمین ہیں نہ کہ وہ وزیراعظم، اپوزیشن لیڈر یا رکن قومی اسمبلی ہیں،
