بیروت: حماس کے رہنما اور   ترجمان اسامہ حمدان کا کہنا ہےکہ غزہ میں اسرائیلی فوج کو   ایک ایک میٹر فاصلہ طے کرنےکی بھاری قیمت چکانی پڑ  رہی ہے، جنگ جتنی لمبی ہوگی، غزہ کی ریت میں اسرائیل کے پاؤں اتنے ہی زیادہ دھنس جائیں گے۔

ایک بیان میں  اسامہ حمدان کا کہنا تھا کہ غزہ کے بپٹسٹ اسپتال کے جرم پر جوابدہ ٹھہرانے میں ناکامی پر اسرائیل کو مزید اسپتالوں میں قتل عام کی شہہ ملی، اقوام متحدہ نے غزہ میں اپنے اسکول  پر اسرائیلی بمباری میں کئی فلسطینیوں کی شہادت کا اعتراف کیا۔

اسامہ  حمدان کا کہنا  تھا کہ ریاض سربراہی اجلاس میں فلسطینیوں کی نسل کشی رکوانےکے لیے مؤثر فیصلوں کا فقدان تھا تاہم غزہ کا محاصرہ  ختم کرانےکے فیصلےکا خیرمقدم کرتے ہیں۔

ان کا کہنا تھا کہ اسرائیلی قبضے سے الشفا اسپتال میں نومولودوں کی جان کو خطرہ ہے، اسپتالوں کو نشانہ  بنانے  پر اسرائیل کو القسام بریگیڈ کے ہاتھوں جواب ملےگا، اسرائیلی فوج کا ناقابل تسخیر ہونےکا تصور 7 اکتوبر کی کارروائی کے بعد تباہ ہوچکا ہے، لاکھوں فلسطینی  اب بھی  غزہ میں موجود ہیں جو  ثابت قدم ہیں، قابض اسرائیلی فوج کوایک ایک میٹر فاصلہ طے کرنےکی بھاری قیمت چکانی پڑتی ہے، جنگ جتنی لمبی ہوگی، غزہ کی ریت میں اسرائیل کے پاؤں اتنے ہی زیادہ دھنس جائیں گے۔

خیال رہےکہ غزہ میں37 روز سے اسرائیل کی بربریت جاری ہے جس میں اب تک شہید ہونے والے فلسطینیوں کی تعداد 11 ہزار 100 سے تجاوز کرگئی۔

فلسطینی وزارت صحت کے ترجمان کے مطابق اسرائیلی جارحیت سے 11 ہزار سے زائد شہید افراد میں 8 ہزار سے زائد بچے اور خواتین بھی شامل ہیں۔

اسرائیلی کارروائیوں میں اب تک زخمیوں کی تعداد 28 ہزار سے تجاوز کرگئی ہے۔

الشفا اسپتال کمپلیکس سے صحافی نے  امریکی میڈیا سےگفتگو میں بتایا کہ  اسرائیلی ٹینک اسپتال کے شمال میں 200 میٹر کے فاصلے پر موجود ہیں، اسپتال کے اطراف شدید  فائرنگ ہو رہی ہے، اسپتال کی صورتحال مسلسل ابتر ہوتی جا رہی ہے۔

 صحافی نے بتایا کہ اسپتال میں 4 روز سے 70 سے زیادہ میتیں رکھی ہوئی ہیں جن کی تدفین کرنا ہے، اسپتال کی عمارت میں ہر طرف گندگی پھیلی ہوئی ہے،گندگی سے اٹھنے والی بدبو  تصور  سے باہر ہے، اسپتال میں طبی عملے اور مریضوں سمیت 15 ہزار سے زائد  بےگھر فلسطینی موجود ہیں۔