راولپنڈی: پاکستان مسلم لیگ ن راولپنڈی کے سیکرٹری اطلاعات اکمل مرزا نے سپریم کورٹ سے عمران خان کے بیان کا از خود نوٹس لینے کا مطالبہ کیا ہے۔ ایک بیان میں انہوں نے کہا کہ عمران خان نے آئندہ ماہ میاں نواز شریف کو سزا ہونے کا بیان دے کر عوام کو تاثر دیا ہے کہ فیصلہ لکھا جا چکا اور انہیں اس فیصلے سے آگاہ بھی کر دیا گیا ہے۔ اکمل مرزا نے کہا کہ عمران خان کا بیان پورے عدالتی نظام کے لئے لمحہ فکریہ ہے۔ سپریم کورٹ اس بیان کا از خود نوٹس لے کر عمران خان سے جواب طلب کرے۔ انہوں نے کہا کہ عمران خان کی ہر بات لغو ، بے بنیاد اور بلا جواز ہوتی ہے ، نواز شریف سسٹم ڈی ریل کرنا چاہتے تو مرکز اور پنجاب میں حکومتیں ختم کر کے بحران پیدا کر سکتے تھے۔ نواز شریف نے پارلیمانی و جمہوری نظام کے تسلسل کے لئے نااہلی کی سزا قبول کی اور اب ٹرائل کورٹ میں اپنا بھرپور دفاع کر رہے ہیں۔ قوم جاننا چاہتی ہے کہ عمران خان نے یہ بیان کن معلومات کی بنیاد پر دیا ، کیا فیصلہ لکھ کر انہیں پہلے ہی آگاہ کر دیا گیا ہے۔ اکمل مرزا نے کہا کہ اگر عمران خان سے پوچھ گچھ نہ کی گئی تو ہم یہ سمجھنے میں حق بجانب ہوں گے کہ دال میں کچھ کالا ضرور ہے
142
